آو حضور تم کو ستاروں میں لے چلوں۔۔

 آو حضور تم کو ستاروں میں لے چلوں۔۔۔! 

۔۔۔۔۔۔۔۔۔۔۔۔۔۔۔۔۔

✒انس بجنوری

 

      اہل محبت کا کارواں ، عزم و ہمت کا اک جہاں ، جنت نظیر و جنت نشاں ، جہد مسلسل کی طویل داستاں  اکابر دیوبند کی ہمت کا شاہ کار ،نانوتوی کی لائی ہوئی بہار،خاندان ولی اللہی کے پیغام کا امین ، اسماعیل شہید کے خوابوں کی سرزمیں  قاسم کے انفاس کی مہک ۔۔۔محمود کے جلووں کی جھلک  گوہر نایاب شب چراغ ۔۔گلشن توحید کی بہار میکدہء بادہء کہن ۔۔۔منزل گم گشتہ کا سراغ ۔۔۔۔اہل حق کا کارواں ۔۔منزل محبوب کا نشاں صبح سعادت کا آفتاب ۔۔جذبہء بیتاب کی نمو ۔۔بحر نبوت کی آب جو۔۔۔ شب کے ظلمت کدے میں مزدہء سحر امداد و قاسم کی دعائے سحر کا اثر ۔۔۔فضل الرحمن و عابد کے چشم و چراغ کی خبر ۔۔سید احمد شہید کا ولولہ ۔۔۔رشید احمد گنگوہی کا تفقہ ۔۔۔یعقوب کی نگاہ رسی کا حسن و جمال ۔۔شیخ الہند کے فکر و شعور کا پیکر۔۔اشرف علی کا فیضان عام ۔۔۔عزیز و حبیب کے سوز و ساز اور زہد و تفقہ کی زندہ یاد گار حضرت انور کے انوری علوم کا پاکیزہ چمن شبیر کے علوم و معارف کا بانکپن ایک عجیب جہاں ۔۔۔ایک خوش نما مقام جہاں کی خاک کا ہرذرہ اور درخت کا ہر غنچہ ہمسر ماہ تمام۔۔۔۔۔

دنیا کے شور و شرر سے دور ، گردش کی تلخیوں اور تلخابہء ہستی سے مفرور ۔۔۔اذان بلال کی باز گشت اور قال اللہ و قال الرسول کے سحر انگیز نغمات سے دیوار و در مسحور۔۔! وادئ فاراں سے اٹھی ہوئی صدائے تکبیر ۔۔۔ہستی کے صنم خانوں کے لیے آگ اگلتی ہوئی شمشیر  ۔۔۔ایسی کاخ فقیر جس کے آگے شاہوں کے محل جھک جاتے ہیں ۔۔۔ایسی وادئ گل جہاں کا ہر ذرہ خورشید جہاں کہلاتا ہے۔۔۔۔

جہاں ساون کے اندھیاروں میں گلبانگ سحر کا غلغلہ رونما ہے۔۔۔۔اور عزم حسین سے ہنگامہء گیر و دار بپا ہے۔۔۔میرا مادر علمی ، علم وہنر کا گہوارہ ، تاریخی شہہ پارہ ، عظمت اسلام کا مینارہ۔۔۔۔۔۔افراد سازی کا صنم خانہ ۔۔۔۔۔خاک ارضی پر حرمت اسلام کا محافظ، حریم ختم نبوت کا پاسباں۔۔۔۔شرعی علوم کا باغباں۔۔۔قاسمی و عثمانی خاندان کا سب سے عظیم کارنامہ۔۔۔۔عابد کے یقیں کا روشن چراغ۔۔۔طیب کی جد و جہد کا مرکز ۔۔مدنی کی سیاست کی مشعل۔۔۔انور شاہ کے علمی جواہر اور نوادرات کی عظیم درس گاہ۔۔۔۔۔الغرض!

یہ ایک صنم خانہ ہے جہاں ، محمود بہت تیار ہوئے!!